Cyfleusterau deunyddiau - gwirio, hysbysu, samplu ac adrodd

Os ydych yn gweithredu cyfleuster deunyddiau hysbysedig yng Nghymru, rhaid i chi:

• roi gwybod i ni am eich manylion hunanasesiad
• talu ffi i ni
• samplu gwastraff sy'n dod i mewn ac sy’n mynd allan
• dadansoddi cyfansoddiad samplau
• adrodd ar ganlyniadau i ni bob chwarter
  
  

Cwblhau hunanasesiad

Rhaid i chi wirio a yw eich cyfleuster gwastraff yn bodloni'r diffiniad o 'gyfleuster deunyddiau'.

Os ydyw, dylech wedyn gwblhau hunanasesiad ar ddechrau pob cyfnod adrodd. Y pedwar cyfnod adrodd yw:

• 1 Ionawr i 31 Mawrth
• 1 Ebrill i 30 Mehefin
• 1 Gorffennaf i 30 Medi
• 1 Hydref i 31 Rhagfyr
  
  

Rhoi gwybod am eich manylion hunanasesiad

Os yw eich hunanasesiad yn dangos y dylai eich cyfleuster fod yn gyfleuster deunyddiau hysbysedig, rhaid i chi ddweud wrthym erbyn diwedd y cyfnod adrodd.

Dylech hefyd ddweud wrthym os yw eich hunanasesiad yn dangos na ddylai eich cyfleuster bellach fod yn gyfleuster deunyddiau hysbysedig.

Efallai y byddwn yn gofyn am dystiolaeth gan weithredwyr y credwn y dylent fod wedi datgan fod eu cyfleuster deunyddiau yn gyfleuster hysbysedig ond nad ydynt wedi cyflwyno datganiad i ni.

Samplu a mesur y gwastraff

Yn dibynnu ar eich gweithgareddau bydd angen i chi gymryd samplau a mesuriadau o ddeunyddiau gwastraff sy'n dod i mewn ac yn mynd allan.

Darganfyddwch sut i gymryd samplau o ddeunyddiau gwastraff. 

Bydd yn rhaid i chi lunio methodoleg samplu ysgrifenedig. Rhaid i hyn egluro sut y byddwch yn bodloni'r gofynion samplu. 

Rhoi gwybod am eich data

Rhaid i chi gyflwyno eich data i ni ar gyfer pob cyfnod adrodd. Rhaid i hyn fod o fewn mis i ddiwedd pob cyfnod adrodd.

Darganfyddwch pa ddata sydd ei angen arnom. 

Pan fyddwch yn datgan bod eich cyfleuster deunyddiau yn gyfleuster hysbysedig, byddwn yn darparu fformat electronig i chi i adrodd eich data. 

Talu ffi

Byddwn yn codi ffi cynhaliaeth flynyddol arnoch.

Darganfyddwch pa ffioedd y mae'n rhaid i chi eu talu. 

Sut rydym yn rheoleiddio cyfleusterau deunyddiau

Byddwn yn rheoleiddio cyfleusterau deunyddiau i:

• wirio’ch methodoleg samplu
• arsylwi eich gweithgareddau samplu
• archwilio'r data rydych wedi adrodd, a’u cymharu â’r hyn a welwn ar y safle

Byddwn yn cydnabod os oes dulliau priodol yn cael eu defnyddio.

Os na fydd y dulliau cywir yn cael eu defnyddio, byddwn yn gadael ichi wybod pa welliannau sydd angen eu gwneud.